رؤف صدیقی اور انکی اہلیہ مدینہ جاتے ہوئے کار حادثے میں زخمی، اسپتال منتقل

متحدہ قومی موومنٹ (ایم کیو ایم) پاکستان کے رہنما رؤف صدیقی کی گاڑی کو سعودی عرب میں مدینہ جاتے ہوئے حادثہ پیش آیا ہے۔

ایم کیو ایم پاکستان کے رہنما رؤف صدیقی کے اہلِخانہ نے اس حوالے سے تصدیق کی ہے۔

اہلخانہ کے مطابق حادثے میں رؤف صدیقی اور ان کی اہلیہ زخمی ہوئے ہیں، دونوں کو اسپتال منتقل کر دیا گیا ہے۔

سندھ کے سابق صوبائی وزیر برائے صنعت و تجارت رؤف صدیقی اپنے اہلِ خانہ کے ہمراہ مکہ مکرمہ سے مدینہ منورہ جا رہے تھے کہ ان کی گاڑی کو حادثہ پیش آیا۔

رؤف صدیقی ان دنوں عمرے کی ادائیگی کے لیے اہلِ خانہ کے ہمراہ سعودی عرب میں موجود ہیں۔