پولیس نے اغوا کی گئی 2 لڑکیوں کو بردہ فروش گروہ سے بچالیا
کراچی پولیس نے لاہور اور فیصل آباد سے اغوا کی گئی 2 لڑکیوں کو بردہ فروش گروہ سے بچالیا، اسپیشل سیکیورٹی یونٹ (ایس ایس یو) اور مددگار ون فائیو نے 2 لاوارث لڑکیوں کو حفاظتی تحویل میں لے لیا، لڑکیوں کے مطابق ایک شخص انہیں فروخت کرنا چاہتا تھا۔
کراچی ایئر پورٹ کے قریب 19 سالہ طیبہ اور 17 سالہ حمیرا بھاگتی ہوئی ایس ایس یو کے جوانوں کے پاس آئیں اور بتایا کہ ایک شخص انہیں فروخت کرنے جا رہا ہے۔
اہلکاروں نے لڑکیوں کو حفاظتی تحویل میں لیکر مددگار ون فائیو کو کال کی، جس کے بعد لڑکیوں کو تھانے منتقل کردیا گیا۔
عائشہ نامی خاتون دونوں لڑکیوں کو پنجاب سے نوکری کا جھانسہ دے کر کراچی لے آئی تھی، خاتون نے دونوں لڑکیوں کو کسی اور شخص کے حوالے کر دیا، جو انہیں فروخت کرنے کے لیے اپنے ساتھ لے جارہا تھا، اس دوران موقع ملتے ہی لڑکیوں نے پولیس کو دیکھتے ہی مدد مانگ لی۔
پولیس حکام کا کہنا ہے کہ دونوں لڑکیاں 10 ماہ سے ملزم رفیع کے پاس تھیں، موقع ملنے پر بھاگ کر پولیس کے پاس پہنچ گئیں، لڑکیوں کے مطابق عائشہ نامی عورت نوکری کا جھانسہ دے کر کراچی لائی تھی۔
پولیس کا کہنا ہے کہ دونوں لڑکیوں کے اغوا کے مقدمات لاہور اور فیصل آباد میں درج ہیں، مددگار 15 نے فوری لڑکیوں کے ورثا سے اوکاڑہ اور فیصل آباد میں رابطہ کرلیا ہے۔
پولیس نے لڑکیوں کا بیان لے لیا ہے، مزید کارروائی قانون کے مطابق عمل میں لائی جائے گی۔
