پنجاب میں 25 فیصد زائد بارشوں کا امکان ، کراچی میں جمعے کو بارش کی پیش گوئی
پرووینشیل ڈیزاسٹر مینجمنٹ اتھارٹی ( پی ڈی ایم اے ) نے پنجاب میں اس سال مون سون کی بارشیں معمول سے 25 فیصد زیادہ ہونے کی پیش گوئی کی ہے، جبکہ محکمہ موسمیات ( پی ڈی ایم ) نے کراچی میں جمعے کو بارش کا امکان ظاہر کیا ہے۔
محکمہ موسمیات پہلے ہی 25 جون بدھ سے ملک بھر میں مون سون بارشوں کی پیش گوئی کر چکا ہے، مون سون کی بارشیں جون سے ستمبر کے درمیان ہوتی ہیں، جو گرمی سے نجات دیتی ہیں اور آبی ذخائر کو بھرنے کے لیے نہایت اہم ہیں۔
پی ڈی ایم اے کے بیان کے مطابق، پنجاب میں مون سون کی بارشوں کا آغاز ہو چکا ہے اور پہلا اسپیل یکم جولائی تک جاری رہے گا، اس دوران بیشتر اضلاع میں تیز ہواؤں اور گرج چمک کے ساتھ بارش کی پیش گوئی کی گئی ہے۔
ریلیف کمشنر پنجاب، نبیل جاوید نے صوبے بھر کے کمشنرز اور ڈپٹی کمشنرز کو ہائی الرٹ رہنے کی ہدایت جاری کی ہے، انہوں نے کہا کہ ریسکیو 1122 اور واسا سمیت تمام متعلقہ ادارے الرٹ پر ہیں۔
پی ڈی ایم اے کے مطابق راولپنڈی، مری، گلیات، اٹک، چکوال، منڈی بہاؤالدین، حافظ آباد، گجرات، جہلم اور گوجرانوالہ میں تیز ہواؤں کے ساتھ بارش کی پیش گوئی کی گئی ہے جبکہ لاہور، فیصل آباد، سیالکوٹ، نارووال، ٹوبہ ٹیک سنگھ، جھنگ، سرگودھا اور میانوالی میں بھی بارش متوقع ہے۔
جنوبی پنجاب میں ملتان، ڈیرہ غازی خان، بہاولپور اور بہاولنگر میں 26 سے 28 جون تک بارش کی پیش گوئی کی گئی ہے۔
پی ڈی ایم اے کے ڈائریکٹر جنرل نے وزیراعلیٰ کی ہدایات پر ضلعی انتظامیہ کو الرٹ جاری کیا ہے، انہوں نے کہا کہ ’ اس سال مون سون کی بارشیں معمول سے 25 فیصد زیادہ ہوں گی۔’
انہوں نے مزید کہا کہ ’ محکمہ صحت، آبپاشی، تعمیرات و مواصلات، بلدیات اور لائیو اسٹاک کو الرٹ جاری کر دیا گیا ہے۔’
