اسلام آباد اور راولپنڈی میں موبائل سگنلز اور راستوں کی بندش تیسرے روز بھی جاری

پاکستان کے دارالحکومت اسلام آباد اور اس کے ملحقہ شہر راولپنڈی میں پاکستان تحریکِ انصاف کے احتجاج کے پیشِ نظر موبائل سگنلز اور راستوں کی بندش آج تیسرے روز بھی جاری ہے۔

اسلام آباد پولیس کے ترجمان نے بی بی سی کو بتایا ہے کہ کیونکہ پی ٹی آئی کی جانب سے تاحال احتجاج ختم نہیں کیا گیا ہے اس لیے ڈی چوک اور ریڈزون سمیت اسلام آباد اور راولپنڈی میں مختلف جگہوں پر پولیس کی بھاری نفری تعینات ہے۔

خیال رہے کہ گذشتہ رات پی ٹی آئی کی پولیٹیکل کمیٹی کے اجلاس کے بعد پارٹی کی جانب سے وزیرِ اعلیٰ خیبرپختونخوا کی غیرموجودگی میں بھی احتجاج جاری رکھنے کا اعلان کیا گیا تھا۔

اسلام آباد پولیس کے ایک اہلکار نے نام ظاہر نہ کرنے کی شرط پر بی بی سی کو بتایا کہ ’اس وقت بلیو ایریا میں چند مظاہرین موجود ہیں جبکہ فیض آباد اور راولپنڈی کے کچھ علاقوں میں بھی ان کی موجودگی کی اطلاعات ہیں۔‘

اس کے علاوہ جڑواں شہروں میں چلنے والی میٹروبس سروس آج تیسرے روز بھی معطل ہے۔