دھرمیندر 89 سال کی عمر میں انتقال کر گئے

بالی ووڈ کے مشہور اداکار دھرمیندر 89 سال کی عمر میں انتقال کر گئے۔

بھارتی خبر رساں ایجنسی آئی اے این ایس کے مطابق آج پیر، 24 نومبر کو بالی ووڈ کے ’’ہی مین‘‘ کے طور پر مشہور اداکار دھرمیندر ممبئی میں اپنے گھر پر انتقال کر گئے۔

دھرمیندر کو اس ماہ کے شروع میں سانس کی تکالیف کی وجہ سے بریچ کینڈی اسپتال میں داخل کرایا گیا تھا، انھوں نے اداکاری کی ایک شان دار 6 دہائیوں پر محیط میراث چھوڑی ہے۔ ان کی زندگی کی آخری فلم ’اِکّیس‘ ہوگی، جو 25 دسمبر کو ریلیز ہونے والی ہے۔

دھرمیندر نے بیواؤں پراکاش کور اور ہیما مالنی اور 6 بچوں کو سوگوار چھوڑا ہے، ان کے بچوں میں اداکار سنی دیول، بوبی دیول، ایشا دیول اور آہنا دیول کے ساتھ ساتھ اجیتا اور وِجیتا شامل ہیں۔

بھارتی سینما کے سب سے بڑے اسٹارز میں شمار کیے جانے والے دھرمیندر نے اپنا کیریئر 1960 کی فلم ’دل بھی تیرا ہم بھی تیرے‘ سے شروع کیا تھا۔ ایک ایسے فن کار کے طور پر جنھوں نے سنجیدہ اور ہلکے پھلکے کرداروں دونوں میں اپنی صلاحیت کا لوہا منوایا، انھیں 2012 میں بھارت کی حکومت کی جانب سے تیسرا بڑا سویلین اعزاز پدم بھوشن سے نوازا گیا تھا۔

اپنے چھ دہائیوں کے کیریئر میں انھوں نے متعدد ہٹ فلموں میں کام کیا، جن میں شعلے، یادوں کی بارات، میرا گاؤں میرا دیش، پرتگیا، چپکے چپکے، نوکر بیوی کا، پھول اور پتھر، دل نے پھر یاد کیا، آئے دن بہار کے، آنکھیں، آیا ساون جھوم کے، جگنو، چرس، دھرم ویر، آزاد، لوہا، حکومت اور اپنے شامل ہیں۔