عمان کا 2 لاکھ ریالز کے عوض 10 سالہ گولڈن رہائشی منصوبے کا اعلان
خلیجی ملک عمان نے غیر ملکی سرمایہ کاری اور سیاحت کاری کے فروغ کے لیے اب تک کے بہترین رہائشی منصوبے کا اعلان کردیا، جس کے تحت کاروباری حضرات محض 2 لاکھ عمانی ریالز دے کر ویزا حاصل کر سکیں گے۔
عرب اخبار ’گلف نیوز‘ کے مطابق عمان نے غیر ملکی سرمایہ کاروں اور ہنرمند افراد کو راغب کرنے کے لیے 10 سالہ ’گولڈن رہائشی پروگرام‘ متعارف کرادیا۔
مذکورہ پروگرام عمان کے ویژن 2040 اصلاحات کا حصہ ہے، جس کے تحت ملک میں سیاحت، صنعت اور تجارت کو بڑھایا جائے گا۔
رپورٹ کے مطابق ’پائیدار کاروباری ماحول‘ کے عنوان سے ہونے والی ایک تقریب میں حکام نے منصوبے کا اعلان کیا۔
حکام کے مطابق مذکورہ پروگرام نجی شعبے کی ترقی، روزگار کے مواقع بڑھانے اور علم کے تبادلے کو فروغ دینے کے لیے اہم ہے۔
مذکورہ پروگرام کے تحت جو سرمایہ کار کم از کم 2 لاکھ عمانی ریال (تقریبا 5 لاکھ 20 ہزار امریکی ڈالر) کی سرمایہ کاری کریں گے، وہ 10 سال کے قابل تجدید رہائشی اجازت نامے حاصل کر سکیں گے۔
مذکورہ اجازت نامہ عمر یا تعداد کے بغیر ان کے بیوی بچوں اور قریبی رشتہ داروں کے لیے بھی ہوگا۔
پروگرام کے تحت سرمایہ کارایئرپورٹ پر فاسٹ ٹریک سروسز، تین گھریلو ملازمین رکھنے اور مختص علاقوں میں ایک جائیداد خریدنے کا حق بھی حاصل کر سکیں گے۔
حکام نے بتایا کہ سرمایہ کار سات مختلف طریقوں سے اس پروگرام کے لیے اہل ہو سکتے ہیں، جن میں دو لاکھ عمانی ریالز سے زائد سرمایہ کے ساتھ کمپنی قائم کرنا۔
سیاحتی کمپلیکس میں جائیداد خریدنا اور دو سال سے زائد میعاد کے سرکاری ترقیاتی بانڈز رکھنا بھی شامل ہیں۔
اس کے علاوہ دو لاکھ عمانی ریالز سے زائد کی فہرست شدہ ایکوئٹی میں سرمایہ کاری کرنا، پانچ سالہ فکسڈ بینک ڈپازٹ رکھنا، کم از کم 50 عمانی ملازمین کے ساتھ کمپنی بنانا اور غیر ملکی سرمایہ کاری قانون کے تحت کمپنیوں کی نامزدگی کرنے کی سہولیات بھی شامل ہیں۔
عمانی وزارت تجارت، صنعت و سرمایہ کاری کے مطابق مذکورہ پروگرام عمان کے اہم شعبوں جیسے لاجسٹکس، سیاحت، اور قابل تجدید توانائی میں سرمایہ کاری کو فروغ دے گا۔
اس موقع پر انویسٹرز سروسز سینٹر کی ڈائریکٹر جنرل نسیمہ بنت یحییٰ البلوشی نے بتایا کہ گولڈن رہائش منصوبہ صرف اجازت نامہ نہیں بلکہ مواقع، استحکام، اور بہتر زندگی کا وعدہ ہے، کیوں کہ عمان 2024 کے کوالٹی آف لائف انڈیکس میں چوتھے نمبر پر تھا۔
