اسرائیل کا حماس کے بانی رہنما اور حزب اللہ کے سینئر کمانڈر کو شہید کرنے کا دعویٰ
اسرائیلی فوج نے حماس کے بانی رہنما حکم محمد عیسیٰ العیسیٰ اور حزب اللہ کے کمانڈر عباس الحسن وہبی کو شہید کرنے کا دعویٰ کیا ہے۔
قطر کے نشریاتی ادارے الجزیرہ کے مطابق اسرائیلی فوج نے دعویٰ کیا ہے کہ اس نے غزہ سٹی میں جھڑپوں کے دوران حماس کے ایک سینئر رہنما حکم محمد عیسیٰ العیسیٰ کو ہلاک کر دیا ہے۔
فوج کی جانب سے جاری بیان میں کہا گیا ہے کہ ’حکم محمد عیسیٰ العیسیٰ حماس کے عسکری ونگ کے ایک سینئر رہنما تھے اور تنظیم کے بانیوں میں شمار ہوتے تھے‘۔
بیان میں مزید کہا گیا کہ ماضی میں عیسیٰ نے غزہ کی پٹی میں حماس کی عسکری صلاحیتوں کو بڑھانے کے لیے اہم کردار ادا کیا، وہ اس کے عسکری ونگ کے بانیوں میں شامل تھے، تربیتی ہیڈکوارٹر کے سربراہ کے طور پر خدمات انجام دیتے رہے اور حماس کی جنرل سیکیورٹی کونسل کے رکن بھی تھے۔
فوج نے دعویٰ کیا کہ عیسیٰ نے 7 اکتوبر کے حملوں کی منصوبہ بندی اور اس پر عمل درآمد میں بھی نمایاں کردار ادا کیا، تاہم حماس کی جانب سے ان دعووں پر تاحال کوئی تبصرہ سامنے نہیں آیا۔
دریں اثنا، اسرائیلی فوج نے جنوبی لبنان کے علاقے محرونا میں کیے گئے ایک فضائی حملے میں حزب اللہ کے ایک کمانڈر کو شہید کرنے کا دعویٰ کیا ہے۔
اسرائیلی فوج کے بیان میں کہا گیا ہے کہ’آج صبح اسرائیلی فوج نے ایک کارروائی میں عباس الحسن وہبی کو شہید کیا ہے، جو حزب اللہ کی ’رضوان فورس‘ بٹالین کے انٹیلیجنس چیف تھے۔
بیان میں عباس الحسن وہبی پر الزام عائد کیا گیا ہے کہ وہ حزب اللہ کو دوبارہ فعال کرنے اور اسلحہ منتقل کرنے کی کوششوں میں ملوث تھے، جو اسرائیل اور لبنان کے درمیان طے پانے والی مفاہمت کی صریح خلاف ورزی ہے۔
