7 ہزار میگاواٹ اضافی بجلی صنعتی اور زرعی صارفین کو سستی دینے کا منصوبہ

وفاقی وزیر برائے توانائی سردار اویس احمد خان لغاری نے کہا ہے کہ حکومت کے پاس اس وقت 7 ہزار میگاواٹ اضافی بجلی موجود ہے، بغیر کسی سبسڈی کے یہ بجلی 7 سے ساڑھے 7 سینٹ میں صنعت اور زراعت کو دی جاسکتی ہے،6 ماہ سے اس اسکیم کی منظوری کے لیے آئی ایم ایف کے ساتھ مشاورت کررہے ہیں۔

وفاقی وزیر برائے توانائی سردار اویس احمد خان لغاری نے پرائیویٹ پاور اینڈ انفراسٹرکچر بورڈ (پی پی آئی بی) میں نیٹ میٹرنگ سے نیٹ بلنگ کے نظام میں منتقلی کے حوالے سے منعقدہ مشاورتی اجلاس میں شرکت کی۔

اجلاس میں سولر انڈسٹری سے وابستہ ماہرین، متعلقہ سرکاری اداروں، صوبائی حکومتوں اور دیگر اسٹیک ہولڈرز نے شرکت کی۔

وفاقی وزیر توانائی نے تمام شرکا کا شکریہ ادا کرتے ہوئے کہا کہ حکومت نیٹ میٹرنگ کو ختم نہیں کر رہی، بلکہ اس کے موجودہ طریقہ کار کو ایک زیادہ مؤثر، شفاف اور پائیدار ماڈل میں تبدیل کرنے پر غور کر رہی ہے۔