پہلگام حملہ، پاکستان غیر جانبدارانہ تحقیقات میں تعاون کے لیے تیار ہے
وزیراعظم پاکستان شہباز شریف نے انڈیا کے زیر انتظام کشمیر کے علاقے پہلگام میں حملے کے حوالے سے انڈیا کے الزامات کی تردید کی ہے اور کہا ہے کہ پاکستان اس معاملے میں غیر جانبدارانہ تحقیقات میں تعاون کے لیے تیار ہے۔
پاکستان ملٹری اکیڈمی کاکول میں منعقد پاسنگ آؤٹ پریڈ سے خطاب کے دوران وزیر اعظم شہباز شریف نے کہا کہ ’مشرقی پڑوسی نے بغیر تحقیقات اور قابل تصدیق شواہد پاکستان پر بے بنیاد الزامات لگائے ہیں۔ پہلگام سانحہ کے بعد الزامات کا سلسلہ بند ہونا چاہیے۔ ذمہ دار ملک کی حیثیت سے پاکستان غیر جانبدار، شفاف اور معتبر تحقیقات میں تعاون کے لیے تیار ہے۔‘
وزیر اعظم شہباز شریف نے کہا کہ ’پاکستان کی مسلح افواج ملک کی سرحدوں کا دفاع کرنے کے لیے تیار ہیں اور اس حوالے سے کسی غلط فہمی میں نہ رہا جائے۔‘
انھوں نے کہا کہ ’اگر انڈیا نے سندھ طاس معاہدہ معطل کر کے پاکستان کا پانی روکنے کی کوشش کی گئی تو اس کا بھرپور طاقت سے جواب دیا جائے گا۔‘
’پانی ہماری لائف لائن ہے اس پر کوئی سمجھوتہ نہیں کیا جا سکتا اور ایسی کوششوں کا بھرپور جواب دیا جائے گا۔‘
