حکومتی ٹیکسوں کے خلاف تاجر تنظیموں کا 28 اگست کو مشترکہ ہڑتال کا اعلان

آل پاکستان انجمن تاجران اور تنظیم تاجران پاکستان نے حکومتی ٹیکس اسکیم کو تاجر دشمن قرار دیتے ہوئے 28 اگست کو مشترکہ ہڑتال کا اعلان کردیا۔

صدر آل پاکستان انجمن تاجران اجمل بلوچ نے کہا کہ انکم ٹیکس ویلوایشن ٹیبل کسی صورت قابل قبول نہیں اور حکومت تاجر دشمن ٹیکس اسکیم فوری طور پر واپس لے، پراپرٹی ویلیو پر اندازے سے انکم نکالنا خلاف قانون ہے۔

انہوں نے کہا کہ حکومت بجلی کے بلوں میں تمام قسم کے ٹیکسز ختم کرے اور بجلی اور گیس کی قیمتوں میں اضافہ اور ظالمانہ سلیبز واپس لیے جائیں۔

ان کا کہنا تھا کہ اتنا بڑا ڈاکہ کہ بجلی کی ضروت 22 ہزار میگاواٹ ادائیگی 48 ہزار میگاواٹ کی جا رہی ہے، حکمرانوں نے 48 ہزار میگاواٹ کی ادائیگی کی لیکن پھر بھی لوڈشیڈنگ جاری ہے، بجلی اور گیس کے بلوں نے عوام کا بھرکس نکال دیا ہے۔

اجمل بلوچ نے مطالبہ کیا کہ صدر، وزیراعظم سمیت تمام وزرا اور سرکاری افسران کلٹس گاڑیاں استعمال کریں اور تمام قسم کی مراعات واپس لے کر مفت بجلی، گیس اور پیٹرول پر پابندی لگائی جائے۔

انہوں نے مطالبہ کیا کہ ریئل اسٹیٹ کے کاروبار پر لگائی گئی قدغنیں واپس لی جائیں، آٹے دالوں اور اشیائے خورد ونوش پر ودہولڈنگ ٹیکس ختم کیا جائے کیونکہ ودہولڈنگ ٹیکس عوام میں خریداری کی سکت ختم کرنے کے مترادف ہے۔

صدر آل پاکستان انجمن تاجران نے کہا کہ ایف بی آر کی جانب سے جاری ایس آر اوز جی۔236 اور ایچ۔236 فوری واپس لیے جائیں اور حکومت کے پاس وقت ہے کہ وہ اسٹیک ہولڈرز کے ساتھ بیٹھ کر بات کر لے۔

انہوں نے کہا کہ 28 اگست بروز بدھ ملک بھر میں مکمل شٹرڈاؤن ہڑتال ہوگی اور ہر طرح کا کاروبار مکمل بند رہے گا۔

اجمل بلوچ نے خبردار کیا کہ مسائل کا حل نہ نکالا گیا تو اگلے مرحلے میں 2 دن کی ہڑتال کا اعلان کر دیں گے۔