حزب اللہ کا اسرائیل کو واضح پیغام

اسرائیل فوج کی جانب سے فلسطین میں بربریت کا سلسلہ جاری ہے، ایسے میں حزب اللہ نے واضح کیا ہے کہ دنیا کے تمام لڑاکا بحری بیڑے بھی آجائیں تو حزب اللہ کو حماس کی حمایت سے دستبردار نہیں کرایا جاسکتا۔

لبنانی میڈیا کا کہنا ہے کہ 20 روز کے دوران لبنان اور اسرائیل کے سرحدی علاقے میں 17اسرائیلی فوجیو ں کو جہنم واصل کیا گیا جبکہ اسرائیلی میڈیا نے تصدیق کی ہے کہ 7 اکتوبر سے جاری آپریشن الاقصیٰ طوفان میں اسرائیل کے 309 فوجی ہلاک ہوچکے ہیں جبکہ 224 افراد تاحال یرغمال ہیں۔

حزب اللہ کے ساتھ ساتھ حماس نے بھی جمعرات کے روز اسرائیل کے شہر تل ابیب سمیت مختلف مقامات کو راکٹوں سے نشانہ بنایا۔ حماس اور حزب اللہ کے حملوں کے سبب سوا لاکھ سے زائد اسرائیلی آبادکاروں کو شمال سے جنوب کی جانب فرار ہونا پڑا ہے۔

دوسری جانب اسرائیل کے خلاف جنگ میں حقیقی فتح حاصل کرنے کیلیے حزب اللہ، حماس اور اسلامی جہاد کی اعلیٰ قیادت نے سر جوڑ لیے۔

رائٹرز کے مطابق حزب اللہ کے سربراہ شیخ حسن نصراللہ نے حماس اور اسلامی جہاد کی اعلیٰ قیادت سے ملاقات میں اسرائیل کے خلاف جاری جنگ پر تبادلہ خیال کیا گیا ہے۔

حزب اللہ کی جانب سے جاری کردہ مختصر اعلامیے کے مطابق ملاقات میں شیخ حسن نصراللہ، حماس کے نائب سربراہ صالح العروری اور اسلامی جہاد کے سربراہ زیاد نخالہ موجود تھے۔

تاہم یہ نہیں بتایا گیا کہ اہمیت کی حامل مذکورہ ملاقات کب اور کہاں ہوئی۔

اعلامیے کے مطابق ملاقات میں جائزہ لیا گیا کہ جنگ میں عالمی برادری کہاں کھڑی ہے اور مزاحمت کیلیے فریقین کو کیا کرنا چاہیے تاکہ غزہ اور فلسطینیوں کو حقیقی فتح حاصل ہو اور وحشیانہ جارحیت کو روکا جائے،اس میں مزید بتایا گیا کہ ہم آہنگی برقرار رکھنے کیلیے رہنماؤں میں اتفاق ہوا۔